<hip>
%{!версия=9} Собо'рное посла'нiе второ'е

Тогw'жде ст~а'гw а=п\сла петра`.

Глава` 1. Зача'ло 64.

Сi'мwнъ пе'тръ, ра'бъ и= посла'нникъ i=и~съ хр\сто'въ,
равноч\стную съ на'ми получи'вшими вjь'ру въ пра'вдjь
бг~а на'шегw и= сп~са i=и~са хр\ста`:

2. блг\дть ва'мъ и= ми'ръ да о<у>=мно'жится въ позна'нiи
бг~а, и= хр\ста` i=и~са гд\са на'шегw.

3. Jа='кw вся^ на'мъ бж\ственныя си'лы <е>=гw`, jа=`же
къ животу` и= бл~гоче'стiю, по'дана ра'зумомъ {позна'нiемъ}
призва'вшагw на'съ сла'вою и= добродjь'телiю,

4. и='миже чт\сна^я на'мъ и= вели^кая w=бjьтова^нiя
дарова'шася, да си'хъ ра'ди бу'дете бж\ственнагw прича^стницы
<е>=стества`, w\тбjь'гше, jа='же въ мi'рjь, по'хотныя
тли`:

5. и= въ са'мое же сiе`, тща'нiе все` привне'сше, подади'те
въ вjь'рjь ва'шей добродjь'тель, въ добродjь'тели же
ра'зумъ,

6. въ ра'зумjь же воздержа'нiе, въ воздержа'нiи же
терпjь'нiе, въ терпjь'нiи же бл~гоче'стiе,

7. во бл~гоче'стiи же братолю'бiе, въ братолю'бiи же
любо'вь.

8. Сiя^ бо су^щая въ ва'съ и= мнw'жащаяся, не пра'здныхъ
ниже` безпло'дныхъ сотворя'тъ вы` въ гд\са на'шегw
i=и~са хр\ста` позна'нiе:

9. <е>=му'же бо нjь'сть си'хъ, слjь'пъ <е>='сть, мжа'й,
забве'нiе прiе'мь w=чище'нiя дре'внихъ свои'хъ грjьхw'въ.

10. (За\ч 65.) Тjь'мже па'че, бра'тiе, потщи'теся и=звjь'стно
ва'ше зва'нiе и= и=збра'нiе твори'ти: сiя^ бо творя'ще,
не и='мате согрjьши'ти никогда'же,

11. си'це бо <о>=би'льнw припода'стся ва'мъ вхо'дъ
въ вjь'чное цр\ство гд\са на'шегw и= сп~са i=и~са хр\ста`.

12. Сегw` ра'ди не w=блjьню'ся воспомина'ти пр\снw
ва'мъ w= си'хъ, а='ще и= вjь'дите, и= о<у>=твержде'ни
<е>=сте` въ настоя'щей и='стинjь.

13. Пра'ведно бо мню`, доне'лjьже <е>='смь въ се'мъ
тjьлеси`, возставля'ти ва'съ воспомина'нiемъ,

14. вjь'дый, jа='кw ско'рw <е>='сть w\тложе'нiе тjьлесе`
моегw`, jа='коже и= гд\сь на'шъ i=и~съ хр\сто'съ сказа`
мнjь`.

15. Потщу'ся же и= всегда` и=мjь'ти ва'съ по мое'мъ
и=схо'дjь па'мять w= си'хъ твори'ти.

16. Не о<у>=хищр<е>'ннымъ бо ба'снемъ послjь'довавше
сказа'хомъ ва'мъ си'лу и= прише'ствiе гд\са на'шегw
i=и~са хр\ста`, но самови'дцы бы'вше вели'чествiя <о>='нагw.

17. Прiе'мъ бо w\т бг~а <о>=ц~а` че'сть и= сла'ву,
гла'су прише'дшу къ нему` w\т велелjь'пныя сла'вы:
се'й <е>='сть сн~ъ мо'й возлю'бленный, w= не'мже а='зъ
бл~гоизво'лихъ.

18. И= се'й гла'съ мы` слы'шахомъ съ небесе` сше'дшь,
съ ни'мъ су'ще на горjь` ст~jь'й.

19. И= и='мамы и=звjь'стнjьйшее пр\оро'ческое сло'во:
<е>=му'же внима'юще jа='коже свjьти'лу сiя'ющу въ те'мнjьмъ
мjь'стjь, до'брjь творите`, до'ндеже де'нь w=зари'тъ,
и= денни'ца возсiя'етъ въ сердца'хъ ва'шихъ,

20. (За\ч 66.) сiе` пре'жде вjь'дуще, jа='кw вся'ко
пр\оро'чество кни'жное по своему` сказа'нiю не быва'етъ.

21. Ни бо` во'лею бы'сть когда` человjь'кwмъ пр\оро'чество,
но w\т ст~а'гw дх~а просвjьща'еми глаго'лаша ст~i'и
бж~iи человjь'цы.

Глава` 2.

Бы'ша же и= лжи'вiи проро'цы въ лю'дехъ, jа='коже и=
въ ва'съ бу'дутъ лжи'вiи о<у>=чи'телiе, и=`же внесу'тъ
<е>='р<е>си поги'бели, и= и=ску'пльшагw и=`хъ вл\дки
w\тмета'ющеся, приводя'ще себjь` ско'ру поги'бель.

2. И= мно'зи послjь'дствуютъ и='хъ нечистота'мъ, и='хже
ра'ди пу'ть и='стинный поху'лится.

3. И= въ преумноже'нiи льсти'выхъ слове'съ {въ лихои'мствjь
льсти'выми словесы`} ва'съ о<у>=ловя'тъ: и='хже су'дъ
и=скони` не косни'тъ, и= поги'бель и='хъ не дре'млетъ.

4. А='ще бо бг~ъ а='ггелwвъ согрjьши'вшихъ не пощадjь`,
но плени'цами мра'ка связа'въ, предаде` на су'дъ му'чимыхъ
блюсти`:

5. и= пе'рвагw мi'ра не пощадjь`, но <о>=сма'го нw'а
пра'вды проповjь'дника сохрани`, пото'пъ мi'ру нече'ствовавшихъ
наведе`:

6. и= гра'ды содw'мскiя и= гомw'ррскiя сже'гъ, разоре'нiемъ
w=суди`, w='бразъ хотя'щымъ нече'ствовати положи'въ:

7. и= прв\днаго лw'та, w=би'дима w\т беззако'нныхъ
въ нечистотjь` сожи'тiя, и=зба'ви:

8. видjь'нiемъ бо и= слу'хомъ пра'ведный, живы'й въ
ни'хъ, де'нь w\т дне` ду'шу прв\дну беззако'нными дjь'лы
му'чаше:

9. (За\ч 67.) вjь'сть гд\сь бл~гоч\сти^выя w\т напа'сти
и=збавля'ти, непра'ведники же на де'нь су'дный му^чимы
блюсти`,

10. наипа'че же в\ъслjь'дъ плотскi'я по'хоти скверне'нiя
ходя'щыя и= w= госпо'дствjь нерадя'щыя: продерза'тел<е>,
себjь` о<у>=гw'дницы, сла'вы не трепе'щутъ ху'ляще:

11. и=дjь'же а='гг~ли крjь'постiю и= си'лою бw'льши
су'ще, не терпя'тъ на ся` w\т гд\са о<у>=кори'зненъ
су'дъ.

12. Сi'и же, jа='кw ско'ти живо'тни <е>=стество'мъ
бы'вше въ поги'бель и= тлю`, въ ни'хже не разумjь'ютъ
ху'ляще, во и=стлjь'нiи свое'мъ и=стлjь'ютъ,

13. прiе'млюще мзду` непра'ведну, сла'сть мня'ще вседне'вное
насыще'нiе, скверни'т<е>ли и= поро'чницы, пита'ющеся
лестьми` свои'ми, jа=ду'ще съ ва'ми,

14. <о>='чи и=му'ще и=спо'лнь блудодjья'нiя и= непреста'емагw
грjьха`, прельща'юще ду'шы неутвержд<е>'ны, се'рдце
науче'но лихои'мству и=му'ще, кля'твы ча^да:

15. w=ста'вльше пра'вый пу'ть заблуди'ша, послjь'довавше
пути` валаа'ма восо'рова, и='же мзду` непра'ведну возлюби`,

16. w=бличе'нiе же и=мjь` своегw` беззако'нiя: под\ъяре'мникъ
безгла'сенъ, человjь'ческимъ гла'сомъ провjьща'вшь,
возбрани` проро'ка безу'мiе.

17. Сi'и су'ть и=сто'чницы безво'дни, w='блацы и= мглы^
w\т вjь'тръ преноси'ми, и=`мже мра'къ те'мный во вjь'ки
блюде'тся.

18. Прегw'рдая бо суеты` вjьща'юще, прельща'ютъ въ
скв<е>'рны плотскi'я по'хоти, w\тбjьга'ющихъ вся'чески
w\т ни'хъ живу'щихъ во льсти`,

19. свобо'ду и=`мъ w=бjьщава'юще, са'ми раби` су'ще
тлjь'нiя: и='мже бо кто` побjьжде'нъ быва'етъ, сему`
и= рабо'тенъ <е>='сть.

20. А='ще бо w\тбjь'гше скве'рнъ мi'ра въ ра'зумъ {позна'нiемъ}
гд\са и= сп~са на'шегw i=и~са хр\ста`, си'ми же па'ки
спле'тшеся побjьжда'еми быва'ютъ, бы'ша и=`мъ послjь^дняя
гw'рша пе'рвыхъ.

21. Лу'чше бо бjь` и=`мъ не позна'ти пути` пра'вды,
не'жели позна'вшымъ возврати'тися вспя'ть w\т пре'данныя
и=`мъ ст~ы'я за'повjьди.

22. Случи'ся бо и=`мъ и='стинная при'тча: пе'съ возвра'щься
на свою` блево'тину, и=: свинiя`, w=мы'вшися, въ ка'лъ
ти'нный.

Глава` 3. Зача'ло 68.

Сiе` о<у>=же`, возлю'бленнiи, второ'е ва'мъ пишу` посла'нiе,
въ ни'хже возбужда'ю воспомина'нiемъ ва'шъ чи'стый
смы'слъ,

2. помяну'ти пре'жде реч<е>'нныя глаго'лы w\т ст~ы'хъ
пр\орw'къ, и= а=п\слъ ва'шихъ за'повjьдь гд\са и= сп~са:

3. сiе` пре'жде вjь'дяще, jа='кw прiи'дутъ въ послjь^днiя
дни^ руга'тел<е>, по свои'хъ по'хотехъ ходя'ще

4. и= глаго'люще: гдjь` <е>='сть w=бjьтова'нiе прише'ствiя
<е>=гw`, w\тне'лjьже бо <о>=тцы` о<у>=спо'ша, вся^
та'кw пребыва'ютъ w\т нача'ла созда'нiя.

5. Таи'тся бо и=`мъ сiе` хотя'щымъ, jа='кw небеса`
бjь'ша и=спе'рва, и= земля` w\т воды` и= водо'ю {и=
посредjь` воды`} соста'влена, бж~iимъ сло'вомъ:

6. тjь'мже тогда'шнiи мi'ръ, водо'ю потопле'нъ бы'въ,
поги'бе.

7. А= нн~jьшняя небеса` и= земля` тjь'мже сло'вомъ
сокров<е>'на су'ть, <о>=гню` блюдw'ма на де'нь суда`
и= поги'бели нечести'выхъ человjь^къ.

8. <Е>=ди'но же сiе` да не о<у>=таи'тся ва'съ, возлю'бленнiи,
jа='кw <е>=ди'нъ де'нь пред\ъ гд\семъ jа='кw ты'сяща
лjь'тъ, и= ты'сяща лjь'тъ jа='кw де'нь <е>=ди'нъ.

9. Не косни'тъ гд\сь w=бjьтова'нiя, jа='коже нjь'цыи
коснjь'нiе мня'тъ: но долготерпи'тъ на на'съ, не хотя`
да кто` поги'бнетъ, но да вси` въ покая'нiе прiи'дутъ.

10. Прiи'детъ же де'нь гд\сень jа='кw та'ть въ нощи`,
во'ньже небеса` о<у>='бw съ шу'момъ мимои'дутъ {по'йдутъ},
стiхi^и же сжига'<е>мы разоря'тся, земля' же и= jа=`же
на не'й дjьла` сгоря'тъ.

11. Си^мъ о<у>=`бо всjь^мъ разоря'<е>мымъ, ка^цjьмъ
подоба'етъ бы'ти ва'мъ во ст~ы'хъ пребыва'нiихъ и=
бл~гоче'стiихъ,

12. ча'ющымъ и= скорjь'е бы'ти жела'ющымъ прише'ствiя
бж~iягw дне`, <е>=гw'же ра'ди небеса` жегw'ма разоря'тся,
и= стiхi^и w=паля'<е>мы раста'ются;

13. Но'ва же нб~се` и= но'вы земли` по w=бjьтова'нiю
<е>=гw` ча'емъ, въ ни'хже пра'вда живе'тъ.

14. Тjь'мже, возлю'бленнiи, си'хъ ча'юще, потщи'теся
нескве'рни и= непоро'чни тому` w=брjьсти'ся въ ми'рjь,

15. и= гд\са на'шегw долготерпjь'нiе сп\снiе непщу'йте,
jа='коже и= возлю'бленный на'шъ бра'тъ па'vелъ по да'ннjьй
<е>=му` прем\дрости написа` ва'мъ,

16. jа='коже и= во всjь'хъ свои'хъ посла'нiихъ, глаго'ля
въ ни'хъ w= си'хъ: въ ни'хже су'ть неудо'бь разу^мна
нjь^кая, jа=`же ненауче'ни и= неутвержде'ни развраща'ютъ,
jа='коже и= прw'чая писа^нiя, къ свое'й поги'бели и=`мъ.

17. Вы' же о<у>=`бо, возлю'бленнiи, предвjь'дяще храни'теся,
да не ле'стiю беззако'нныхъ сведе'ни бы'вше, w\тпаде'те
своегw` о<у>=твержде'нiя,

18. но да расте'те во блг\дти и= ра'зумjь гд\са на'шегw
и= сп~са i=и~са хр\ста`. Тому` сла'ва и= нн~jь и= въ
де'нь вjь'ка. А=ми'нь.

Коне'цъ собо'рному посла'нiю второ'му ст~а'гw а=п\сла
петра`: и='мать въ себjь` главы^ 3, зача^лъ же церко'вныхъ
5.

</hip>